Omaly maraina, nirehitra tampoka ny efitrano fanaovana lanonana ao amin’ny  lisea Moderne Ampefiloha (Lma). Nikoropaka ireo mpianatra sy mpanabe vao nahita setroka nivoaka avy ao amin’ilay efitra satria efa tao anatin’ny fianarana tanteraka izy ireo no niseho ny loza. Samy nikoropaka nanavotra ny tenany ny rehetra. Ireo tompon’andraikitra kosa niantso avy hatrany ny mpamonjy voina. Nidina teny an-toerana ny fiara miisa 2 namono ny afo ka voafehy ara-potoana ihany ny fahamaizana. Araka ny filazan’i provizera Razakamanana Nirina dia fifampikasohan’ny herinaratra no nahatonga ny loza. Tsy nisy ny aina nafoy na naratra fa ho fisorohana ny loza mbola mety hitranga dia naato ny fampianarana ao amin’ny Lma amin’izao fotoana izao. « Najanona tsy hianatra ireo mpianatra fa amin’ny alakamisy maraina vao miverina mamonjy fianarana. Mbola hiantso Jirama izahay hamerina ny « installation » rehetra sao mbola  misy ankizy mikitikitika ka lasa miteraka fifampikasohan’ny herinaratra fanindroany indray », hoy ny fanazavan’i Razakamanana Nirina hatrany.

Laurena Nany