Olona roa indray no namoy ny ainy vokatry ny loza ateraky ny môtô. Teo amin’ny toerana iray atao hoa Laingomena, eny Ambohijanaka no nitrangan’izany ny alahady maraina ny pantekosta lasa teo. Nanao taingin-droa tamin’ny môtô skotera ireto lehilahy ireto ary nandeha mafy dia mafy nefa miditra ny fiolahana. Tsy nahatana ny familiana ka nifatratra tany amin’ny vavahady manamorona ny lalana. Mafy ny fianjerana ka ny lohan-dry zalahy no nandia ny tany. Nivoaka ra ny orona sy sofin’izy ireo, hany ka samy torana tsy nahatsiaro tena. Nifamonjen’ireo nanatri-maso nentina tany amin’ny hopitaly saingy tsy tana intsony ny ain’izy roalahy. Tamin’ny fizahana natao no nahalalana fa avy nandray zava-pisotro mahamamo izy ireo satria nahenoana fofona alikaola ny razana.