Nitrangana fanafihan-dahalo mahery vaika indray tany amin’ny distrikan’Iakora, ny 14 may tamin’ny 6ora maraina, tany Ambalamahatsinjo, kaominina Ranotsara avaratra. Mbola teo am-pikarakarana tanteraka ireo fokonolona tamin’io fotoana io no notairin’ireo olon-dratsy tamin’ny alalan’ny poa-basy tsy an-kijanona. Vaky nandositra ny mponina tao an-tanàna raha vao naheno ny firefodrefotry ny basy. Nohararaotin’ireo Malaso tamin’izay ny famoahana ny biby tao am-bala ka nanjavona ny omby 100 mahery. Andian-dahalo mitondra anarana “Barinjaka” miisa 40 eo ho eo izy ireo :  vehivavy ny efatra, valo nilanja basim-borona ary ny ambiny kosa nampiasa zava-maranitra sady nampihorohoro ny iray tanàna.

Vao niala ny tanàna anefa ireo olon-dratsy dia nanaraka avy aty aoriana ireo fokonolona nanao ny fanarahan-dia. Tany amin’ny kilometatra vitsivitsy niala ny kaominina Ranotsara avaratra, nifanehitra ny roa tonta ary raikitra ny fifampitifirana. Dahalo iray no lavon’ny fokonolona , iray tamin’ireo vehivavy efatra no naratra ka noraisim-potsiny. Vao nahita ireo namany maty sy voasambo-belona dia nilavo lefona ireo 38 ambiny ka namela ireo omby teo an-toerana. Tafaverina amin’ny tompony daholo ireo omby rehetra.

Laurena Nany