Nitrangana fanafihana mitam-piadiana teny 67ha, omaly antoandro tamin’ny 2ora mahery kely teo ho eo. Mpamongady iray miorina eo ampitan’ny Mada Hotel no notafihan’ny enin-dahy nitondra basy poleta tsirairay avy sy antsy. Toerana be olona raha ny eny 67ha, indrindra tamin’io ora nisehoan’ny fanafihana io saingy tsy nahasakana ireo olon-dratsy nanatanteraka ny asa ratsiny izany. Tsy nisy ny poa-basy saingy nanambana avy hatrany izy ireo rehefa tonga teo amin’ny tokonam-baravaran’ilay mpivarotra, nandrahona ity farany mba hamoaka ny vola rehetra. Natolotra ireo jiolahy ny vola rehetra izay azo nandritra ny tapak’andro maraina sy ny antoandro, izay tsy fantatra ny isany satria natahotra ny ho faty. Tao anatin’ny indray mipi-maso no nanatontosan’ireo mpangalatra ny fanafihana. Araka ny loharanom-baovao, 5mn teo ho eo raha be indrindra satria vao nahazo izay nilainy izy ireo dia vaky nandositra nihazo ny Ivo. Talohan’izay, mbola noraofin’izy ireo natao tao anaty lamba ny finday rehetra izay namidy teo amin’ny sisin-dalana manoloana ilay mpamongady. Ny nampalahelo, araka ny fitantarana hatrany dia 15mn taorian’ny tranga vao tonga ny mpitandro filaminana nefa eo akaiky eo ny polisy ao amin’ny boriborintany faha-7.

Laurena Nany