Nanatanteraka atrikasam-piofanana  tamin’ny herinandro lasa teo ny mpanao gazety sy ny vondron’olona ifotany ho fanamafisana ny fiarovana ny tandavanala sy ny fikajiana ny tontolo iainana, any Ankeniheny Zahamena. Fiofanana naharitra roa andro tany Moramanga, izay nikaroham-bahaolana sy nametrahana fiaraha-miasa tamin’ireo fikambanana tsy miankina misahana ny fiarovana ny tontolo iainana, indrindra ny ady atao amin’ny fitrandrahana sy fanondranana an-tsokosoko ireo zavamaniry sy biby ary hazo ao anatin’ny ala Ankeniheny Zahamena. Ireo sehatra tsy miankina izay tsy mitazam-potsiny manoloana ny fandripahan’ireo fahavalom-pirenena mamongana sy manondrana an-tsokosoko ireo harena voajanahary iankinan’ny hoavin’ny taranaka any afara. Raha ny tatitra azo mantsy dia 200 000 ha isan-taona ny ala ripaka eto Madagasikara. Nisongadina nandritra ny fiofanana ny fandinihana ny paikady izay heverina fa hahomby hoentina hiarovana sy hikajiana ny tontolo iainana. Ny fitrandrahana loharanom-baovao marim-pototra mba hahafahana manao fitoriana sy famoaham-baovao momba ny asa ratsy sy ireo mpanao izany ihany no paikady tsara indrindra entina hiarovana ny tandavanala. Atrikasam-piofanana notanterahan’ny Cocaz, izay novatsian’ny Wwf vola tamin’ny alalan’ny fanohanana avy amin’ny famatsiam-bolan’ny vahoaka Amerikanina (Usaid).

L.N