Olom-boatendry iray avy amin’ny kaominina Antsinanana sy solom-bavam-bahoaka iray avy ao Antanambao Manampotsy no nifanasa vangy teo imasom-bahoaka. Fifamaliana ompa sy fihantsiana izay niafara tamin’ny ady no nifanaovan’ireo olona natao ho raiamandreny. Heverina ho maodely amin’ny tanàna nefa tsy mahafehy tena sy teny havoaka, noho ny fitiavana vehivavy diso tafahoatra. Tany Vatomandry no nisehoan’izany savorovoro be izany, nandritra ny lanonana Dola Beach, ny pantekôsta lasa teo. Hatairana ny an’ireo nanatri-maso ny ady raha nahita ireo mpanao pôlitika nifanainga vozon’akanjo. Noheverin’ny olona ho disadisa nateraky ny tsy fitovian-kevitra amin’ny maha mpanao pôlitika azy ireo nefa rehefa nozohina akaiky, kay ady vehivavy ilay izy. Mafy ny fifamaliana, hany ka saika torana mihitsy ilay olom-boatendry raha tsy nomen’ireo namany rano mangatsiaka haingana, araka ny loharanom-baovao marim-pototra.

“Henatra ho an’ny Faritra Atsinanana iny zava-niseho iny. Ireo tompon’andraikitra ambony izay noheverina ho raiamandreny be indray ity no nanjary modely ratsy ho an’ny vahoaka.”