Rehefa ela nanaovana ny asa ratsiny izay nampihorohoro ny fokonolona, tany amin’ny kaominina Manalalondo, Mirafangady sy ny manodidina  ireo andian-jiolahy raindahiny mpanao fanafihana mitam-piadiana dia voasambotra sy ravan’ny zandary ihany ny tambajotran’izy ireo. Efa an-taonany maro izy ireo no nampitondra faisana ireo vahoaka any amin’ireo toerana voalaza ireo fa ny 19 may lasa teo vao tratra ka jiolahy efatra no efa eo am-pelantanan’ny mpitandro filaminana amin’izao fotoana izao. Halatr’omby, vaky trano arahana famonoana sy doro trano, fisolokiana sy ny heloka maro samihafa no anenjehena azy ireo.

Vao haingana izy ireo no voalaza fa nanatanteraka fanafihana tany Manalalondo. Latsaka  teo antokontanin’ny niharamboina ny karapanondro ny iray tamin’izy ireo saingy tsy sahy nampilaza ny mpitandro filaminana, noho ny tahotra sao voatafika sy voadoro trano. Taorian’izay anefa dia nahatratrarana omby tsy nisy taratasy tao amin’ny fonenan’ireo olon-dratsy ka tamin’izay vao nirohotra nametraka fitoriana ny fokonolona. “Hay misy olona atahoran’ireto jiolahy ireto ihany. Tsy sahy nitaraina izahay na dia tamin’ny manodidina aza satria lahy tokana ny aina. Misy farany anefa ny zavatra rehetra ka matoky ny zandary sy ny Fitsarana ao Arivonimamo izahay fa hanao sy asany madio sy am-pahamarinana tanteraka ary manantena ny mba hiaina am-pilaminana amin’izay  manomboka izao”, hoy ny solontenan’ireo mponina any an-toerana.

Laurena Nany