Saika ratsy ny fiafaran’ilay tovolahy izay nitondra kodiaran-droa nirimorimo fatratra, tamin’ny lalana iray, teto an-drenivohitra, omaly maraina. Nisongona fiara iray teo alohany ny môtô skotera iray raha iny nisy fiara iray hafa nipoitra tampoka izay nifanehitra taminy avy eny alohany. Vao nahita izany anefa izy dia nitsofoka haingana teo alohan’ilay fiara nosongonany io indray, izay tampoka tamin’ity mpamily ity fa soa ihany fa mbola nanana hakingana nanitsaka hisatra ny tenany sady niaraka tamin’izay ny fampanenoina « klaxon » lava reny fa raha tsy izany dia nahita loza teo ilay tovolahy nitondra môtô. Rifatra nitsoaka indray izy avy eo ary nianjera teny amin’ny arabe rehefa tany amin’ny kilometatra vitsivitsy ka nitangoronan’ny olona. Mafy ny fianjerana, ka naratra mafy ny tenany.