Miaina ao anatin’ny tsy fandriam-pahalemana tanteraka ny distrikan’Amparafaravola ankehitriny. Taorian’ny fanafihana mitam-piadiana nahafatesana renim-pianakaviana, tao amin’ny kaominina Sahamamy, ny zoma 20 may lasa teo dia tokantrano iray hafa ao amin’ny kaominina Ambohimandroso indray no lasibatr’ireo jiolahy, ny alatsinainy 23 may. Dimy lahy nirongo basim-borona miisa 2 no niditra ankeriny tao amin’ny trano fonenan’ny lehilahy iray, tao amin’ny toerana atao hoe Tanambao. Nanapoaka basy in-dray mandeha izy ireo ka voa teo amin’ny tongony havia ilay raim-pianakaviana. Very tamin’izany ny “lecteur Dvd” iray. Taorian’ny fampandrenesana ny mpitandro filaminana dia nidina teny an-toerana ny solontenan’izy ireo nanao ny fizahana ifotony izay zava-nitranga sy nanatanteraka fanarahan-dia. Tsy lasa lavitra anefa dia tratran’ny zandary ny telo tamin’ireo olon-dratsy raha toa ka tafaporitsaka ny roa. Mitohy ny fikarohana.

L.N