Nisesisesy ny fanafihana mitam-piadiana tany Miandrivazo. Tao anatin’ny iray andro dia toerana roa no notafihana andian-jiolahy nirongo basy mahery vaika sy fitaovana maranitra, ny 23 may lasa teo. Tamin’ny misasak’alina no niseho ny fandrobana voalohany, tao Soanafindra, kaominina Dabolava. Dahalo dimampolo mitondra basim-borona sy basy poleta ary zava-maranitra no nandroba olona maromaro tao amin’ny toerana voalaza etsy ambony ka lasa ny vola 10 tapitrisa ariary. Nanao fanarahan-dia ny zandary  sy ny fokonolona taorian’izay ka nisy ny fifampitifirana teo amin’ny roa tonta. Mpanara-dia miisa 3 no naratra nandritra ny fifandonana. Basy poleta vita gasy iray no azo.

Tamin’ny 8ora maraina kosa no nitranga ny fanafihana faharoa, tany antampon-tanànan’i Miandrivazo. Tsy nisy basy fa antsy lava no nentin’ny olona miisa 2 nikasa hanafika paompista amin’ny tobin-tsolika Jovenna ao Amparafara. Kinga ilay tovolahy lasibatra fa raha tsy izany dia saika nanjavona ny lelavola mitentina 60 tapitrisa harotsaka any amin’ny banky. Rehefa tsy nahomby ny teti-dratsin’ireto jiolahy dia nitsoaka izy ireo ka raikitra ny fifanenjehana saingy tsy azo. Na dia izany aza dia nanao ny fanarahan-dia ny zandary any amin’ny borigady Miandrivazo ary nasiana fisafoana eran’ny tanàna.

L.N