Raikitra ny sakoroka teo amin’ireo mpivarotra amoron-dalana sy teratany Sinoa iray, omaly antoandro. Fiara 4×4 nentin’ilay Sinoa nandona olona teny Analakely, tokony ho tamin’ny 2ora sy sasany no niandohan’ny disadisa. Mamo tampina ilay nitondra fiara ka tsy nahatana ny familiana intsony ary nifaoka ireo mpivarotra balôma, araka ny filazan’ireo mpivarotra. Olona telo mianadahy no naratra voafaoka. Saika tsy handray ny andraikiny izy fa ny handositra hitondra ny fiarany. Tsy nandingana lavitra akory anefa ranamana dia tratran’ireo mpivarotra ka tsy afaka nihetsika intsony. Nosokafan’izy ireo ny varavaran’ny fiara ary nosintomin’izy ireo avy ao anatiny ilay mpamily ka daroka sy vono avy hatrany no nitsena azy. Soa fa tonga ara-potoana ny mpitandro filaminana fa raha tsy izany dia ratsy ny nahazo ilay mpamily mamo. Notazomina eny amin’ny foiben’ny polisy Tsaralalana izy mba hiarovana ny ainy.