Horohoro ny an’ireo mpandeha taksibe tamin’ny zotra Tana-Ivato, omaly maraina, raha nidiran’ny mpanendaka tampoka tao anatiny. Tsy nisy nahatsikaritra izay nidiran’ilay olon-dratsy tao fa efa ity farany nanambana antsy ny iray taksibe vao taitra avokoa ny olona. Teny amin’ny lalana digy manakaiky ny fivarotana asa Tanana, vita malagasy no nitrangan’izany. Tovolahy iray manao fiakanjo silamo no nitsangana teny aorian’ny mpamily tamin’io fotoana io. Tsy nisy nipetraka teo amin’ny seza am-povoany na irony antsoina hoe “strapontin” irony ka moramora taminy no nitsofaka teny. Araka ny fitantarana avy amin’ny loharanom-baovao, izay anisan’ireo lasibatra dia norahonany hamoaka ny fananany avokoa ireo mpandeha rehetra fa raha tsy izany dia hotrobarany antsy tsirairay avy. Araka izany, terakovitra ny iray taksibe, indrindra ireo renim-pianakaviana sy ny zaza. Vao naheno izany anefa ny mpamily dia nandray andraikitra avy hatrany nanajanona ilay fiara ka nirohotra nivoaka sady nihoraka ilay mpanendaka niteny hoe : “mbola ho azoko ialahy”. Ilay resevera kosa tetsy ankilany tsy sahy nanao fihetsika hafahafa satria natahotra ny hiharan’ny valy faty ka namela ilay mpanao ratsy nivoaka moramora. Soa anefa fa nisy mpitandro filaminana teo akaiky teo nandray an-tanana ny raharaha fa raha tsy izany dia saika loza. Tsy nisy kosa ny naratra.

Laurena Nany