Mitohy hatrany ny asa ataon’ireo polisy misahana ny ady amin’ny zava-mahadomelina mba hanafoanana ireo mpivarotra sy mpifoka rongony. Noho ny fanomezam-baovao avy amin’ny olona tsara sitrapo dia lehilahy iray 58 taona no tratra teo am-pivarotana rongony, ny 31 may lasa teo, teny Anosizato Andrefana. Rehefa nosavaina tany aminy dia mbola nahitana fonosan-drongony miisa 26. Nentina nihazo ny biraon’ny polisy natao famotorana izy ka nandritra izany no nilazany fa sady mifoka izy no mivarotra. Nambarany kosa anefa fa  tsy azy ireo rongony amidiny ireo fa mikarama izy ary 5 000 ariary isan’andro ny karamany. Nilaza ihany koa izy fa mahalany fonosan-drongony maherin’ny roapolo isa isan’andro. Mbola vao haingana izy no nivarotra rongony fa efa nanomboka tamin’ny faha-17 taonany kosa izy no nidoroka zava-mahadomelina. Araka ny filazany hatrany dia toy ny tambiviny mihitsy ny rongony.