Zazalahy roa no naratra mafy rehefa nipoahan’ny baomba tany Moramanga. Ny 29 may, tamin’ny 6ora hariva, tany Ankeniheny ao amin’ny kaominina Beparasy no nisehoan’izany. Araka ny tatitry ny zandary dia ny 23 mey tokony tamin’ny 9 ora maraina dia nahita “explosif” teo an-tokontany tany amin’ny toerana voalaza io ny ankizilahy 3, rehefa nilalao ka nentin’izy ireo tany an-tranony izany. Tsy nilaza tamin’iza na iza izy ireo fa nolalaovina teny foana ilay baomba nandritra ny herinandro fa tamin’io 29 mey io izany vao nipoaka rehefa nampifampikasohana ny tariby teo aminy. Vokany, potika ny ankihibe sy ny fanondron’ny tovolohay 13 taona ary naratra kosa ny tarehin’ilay faharoa. Niantso ny mpitandro filaminana avy hatrany ny fokonolona vao niseho ny loza ka nandritra ny fizahana no nahalalana fa “explosif” ilay izy satria somary maranitra ny vodiny. Tsy fantatra kosa ny tompon’ilay fitaovana na ny antony saika hampiasana azy. Nentina namonjy ny Chd Moramanga ireo zaza notsaboina. Mitohy kosa ny fanadihadiana hikarohana ny tompony.

Laurena Nany