Nahery vaika ny fifandonana teo amin’ny fokonolona sy ny dahalo nandritra ny fanafihana niseho tany amin’ny toerana roa, tamin’iny tapany atsimon’ny Nosy iny, ny 31 mey lasa teo. Vokany, olona roa no namoy ny ainy. Tany amin’ny distrika Mahabo no niseho ny fanafihana voalohany, tokony tamin’ny 11ora alina, tao amin’ny fokontany Fenoarivo, kaominina Beronono. Andian-dahalo tsy fantatra isa nirongo basim-borona no nanafika ity tanàna ity. Omby maromaro no lasa ary maty voatifitra ny tompon’omby nikasa hanohitra azy ireo. Nisy ny fanarahan-dia taorian’izay ka efa nisy tafaverina ny sasany tamin’ireo omby. Tamin’ny 4ora maraina kosa ny fanafihana manaraka, tany amiin’ny distrika Miandrivazo. Dahalo roapolo isa nilanja basim-borona 15 no nandroba omby miisa 9, tany amin’ny fokontany Ampihiaky, kaominina Anosimena. Fokonolona iray ihany koa no namoy ny ainy nandritra ny fanafihana ary fito no naratra. Mitohy ny fanarahan-dia miaraka amin’ny fokonolona.