Nisongadina fa nisy ny vokatra azo tsapain-tanana eto Madagasikara momba ny fampiharana ny miralenta nefa nihemotra izany amin’ny sehatra sasany. Tsikaritra izany amin’ny fampidirana ny ankizivavy any an-dakilasy saingy mihena an-daharana izy ireo rehefa miakatra ny ambaratonga faharoa sy ny ambaratonga ambony. Eo amin’ny fandraisana fanapahan-kevitra eo anivon’ny fiainanan’ny firenana indray dia nidina ho 20% ny isan’ny solombavambahoaka vehivavy raha 30% izany ny taona 2009-2012 nefa ny 50,2% ny vahoaka Malagasy dia andriambavilanitra avokoa.

Nisy noho izany ny fifanakalozan-kevitra haharitra roa andro teo amin’ny andrim-panjakana momba ny fifanarahana fiara-miasa amin’ny Sadc mahakasika ny miralenta sy ny fampandrosoana, teny Ankorondrano. « Hisy ny volavolan-kevitra hampifandrindrana ary resaka lalàna no andrasana, hijerena ny tena mbola marary amin’ny vehivavy Malagasy. Ohatra amin’izany, ny lalànan’ny fampananan-tany », hoy i Marie Françine Kidja, tale jeneralin’ny fampiroboroboan’ny vehivavy eo anivon’ny Sadc. Araka ny tatitra azo anefa dia efa lany andro ny resaka miralenta eto Madagasikara satria mbola volavolan-dalàna nifandraika tamin’ny Omd ka tsy maintsy hampifandraisina amin’ny Odd 2030 sy Beijing +20 ary ny agenda 2063. Ny volana jolay ho avy izao no ekena izany ary ho soniavina ny volana aogositra, izay vao ho ampiarina amin’ny firenena mivondrona ao amin’ny Sadc.

L.N