Mpianatra miisa 7 amin’ny lisea iray any Mahabo no nosamborin’ny manam-pahefana fa nangalatra tablette ny fianarana. Araka ny vaovao voangona dia nanjavona tampoka tao an-tsekoly ny tablety miisa 32 ny 27 mey lasa teo. Tsy vaky ny efitranon-tsekoly nitoeran’ireo fitaovana ireo tamin’io fotoana io. Nametraka fitarainana avy hatrany teny amin’ny mpitandro filaminana ny tompon’andraikitra ny sekoly ka nisy ny fanadihadiana  natao. Nandritra izany no nahenoina fa ireo mpianatra tao ihany no tompon’antoka tamin’ny fangalarana ka niroso tamin’ny fanadihadiana lalina kokoa ny manam-pahefana ary nahatonga ny fisamborana izy fito ireo. Niaiky fa izy ireo tokoa no nangalatra ireo tablette saingy tsy fantatra ny antony na ny hanaovan’izy ireo ilay fitaovana. Fantatra amin’izao fotoana izao fa efa tafaverina ny 26 amin’ireo tablette fa mbola tadiavina kosa ny ambiny.

Laurena Nany