Vita sonia omaly, ny fifanaraham-piaraha-miasa teo amin’ny oniversite Antananarivo sy ny Psi Madagascar, teo amin’ny profesora Ramanoelina Panja sy Pierre-Loup Lesage, mpisolon-tena maharitra eto an-toerana avy amin’ny Psi. Fifanaraham-piaraha-miasa ho fampiroborobona ny fahasalamana ara-pananahan’ny tanora ka tafiditra amin’izany ny vohoka tsy iriana sy ny fandrindrana ny fiainam-pianakaviana mba hialana amin’ny fanambadiana aloha loatra. Ao ny ady atao amin’ny aretina mifindra, izay azo avy amin’ny firaisana ara-nofo fa indrindra ny tsimokaretina Vih Sida. Ho fiarovana sy fitaizana ireo mpianatra eny anivon’ny anjerimanontolo mba hanatsarana hatrany ny fahaizan’izy ireo. Efa nisy hatrany ny fizaham-pahasalamana, araka ny filazan’ny profesora Ramanoelina Panja, fa ho fanamafisana izany kokoa izao fiaraha-miasa amin’ny Psi Madagascar izao. Nitombo isa ny mpianatra eny amin’ny oniversite Antananarivo tamin’ity taona 2015-2016 ary nahatratra 32 000 mahery izany izay tena lasibatra tokoa noho ny fidiran’izy ireo amin’ny firaisana ara-nofo. Tetikasa andrana haharitra herintaona, azo havaozina ny fifanaraham-piaraha-miasa ary sekoly ambony dimy no hanaovana ny fanentanana dia ny oniversite Ambohitsaina, oniversite Vontovorona, Ens Ampefiloha, oniversite Soavinandriana any Itasy ary oniversite Antsirabe ao Vakinakaratra.

L.N