Ny andron’ny alarobia 8 jona, nisy lozam-pifamoivoizana niseho tany amin’ny lalam-pirenena Rn5. Fiara 4×4 iray no lasa tany anaty rano, tany amin’ny toerana atao hoe Sandrakatsy, distrikan’i Mananara Avaratra. Ratsy ny lalana ary mbola nanampy trotraka ny hamamoanan’ilay mpamily, araka ny vaovao voangona. Tsy nahatana familiana, noho izany ity farany ka nivarina tany an-kady ka hatrany anaty rano mirefy 67 metatra miala ny lalana ny fiara. Vokany, maty tsy tra-drano ilay mpamily noho ny dona mafy nahazo azy. Araka ny hita amin’izao sary izao, mafy ny loza ary lalina ny rano ka sahirana tanteraka ireo mpamonjy voina nanavotra azy sy nampiakatra ilay fiara tao anaty rano. Marihina ihany anefa fa efa nampitaraina ny maro ny faharatsian’ity lalana ity. Miteraka loza maro, izay miafara amin’ny fahafatesana ain’olona anefa tsy mbola misy fanamboarana ihany hatramin’izao. Fantatra hatrany mantsy fa tsy vao izao fa efa betsaka ireo fiara no latsaka tao amin’ity renirano ity noho izay faharatsian-dalana izay hatrany.

Laurena Nany