Vaky vava mihitsy ny olona, indrindra ireo mpampiasa ny zotra D ao anatin’ny koperativa Fifiabe mampitohy  ny renivohitra sy Ambohidratrimo noho ny tsy fitandremana ataon’izy ireo. Omaly maraina, tamin’ny 10ora tany ho any, taksibe iray ao amin’izany koperativa izany indray no namoa-doza, noho ny fifanenjehana teo amin’ izy ireo. Tsy mahay mandray lesona sy tsy mety fay tamin’ny zava-nisy fa voa mainka aza manao ny ataony. Tsy misy dikany amin’ireo mpamily sasany ny loza nahafatesena ain’olona maro hatramin’ny ankizy kely ny faraparan’ny volana aprily iny. Rano nararaka an-damosin’ny gana ireo fiofanana natolotra maimaim-poana tao anatin’ny 10 andro ireny. Nirimorimo mafy ilay taksibe, izay maika hanenjika ny namany eo aloha ka nandona fiara marika 205 izay fianarana mamily fiara, teny Talatamaty. Soa fa tsy nisy ny aina nafoy fa nisy kosa ireo  naratra.  Nahitana fahasimbana kely ihany koa ireo fiara roa. Nanao ny fizahana teny an-toerana ny mpitandro filaminana ary nisintona ny fahazoan-dalana mamilin’ilay saofera namoa-doza.

Laurena Nany