Nahery vaika ny loza nateraky ny kodiaran-droa, ny sabotsy maraina lasa teo, tany amin’ny lalam-pirenena Rn7. Môtô roa samy nandeha mafy no nifandona, rehefa tonga teny Amboanjobe, fokontany Anjomakely, kaominina Bongatsara. Araka ny vaovao voaray, nivoaka ny lalan-kely avy any Amboanjobe ny môtô iray marika Kim royale no nifatratra avy hatrany tamin’ny môtô faharoa marika Ktm. Mafy ny fifandonana ka samy nipitika ireo tovolahy roa namily izany. Ny iray 15 taona nitondra ilay Kim royale tapaka ny tongony, raha toa ka nahitana ratra kely fotsiny teo amin’ny tanan’ilay faharoa izay 28 taona. Potika avokoa ny môtô noenti’izy roalahy ireo. Efa manaraka fitsaboana eny amin’ny hopitaly Hjra ilay tapa-tongotra.