Nisehoana fanafihan-dahalo mitam-basy indray tany amin’ny distrikan’Antsohihy. Omby 35 isa an’olona roa tany amin’ny fokontany Antsalova, kaominina Antsahabe no lasibatra ny alin’ny 10 jona, tamin’ny 10ora tany ho any. Dahalo 3 lahy nitondra basim-borona iray no nangalatra omby miisa 5, tany amin’ny toerana antsoina hoe Ambenjana. Vao nampandrenesina ny zava-misy ny mpitandro filaminana dia nanao fahirano avy hatrany ny kizo fieren’ireo dahalo. Teo am-panaovana izany indrindra izy ireo no naharay antso indray fa lasibatry ny mpangalatra ihany koa ny omby 30 isa tany Andongozo, fokontany Antanambao, kaominina Anjalazala. Raikitra ny fanarahan-dia  avy eo niaraka tamin’ny fokonolona tany Antanantsara ka nifanehitra tany Antanambola, fokontany Antanalabe, kaominina Tsimilao, distrikan’i Befandriana avaratra ny roa tonta ny ampitson’io. Nisy fifandonana teo amin’ny mpanara-dia sy ireo olon-dratsy ka nilavo lefona ireto farany namela ireo omby 30 ireo teo an-toerana. Mbola tsy hita kosa ny omby 5 very teo aloha. Mitohy ny fanadihadiana.

Laurena Nany