Trano fivarotana iray no nidiran’ny olona antsokosoko, ny alin’ny alakamisy lasa teo, tany amin’ny kaominina Vinanivao, distrikan’Antalaha. Nisy alim-pandihizana tany an-toerana tamin’io alina io. Notaomin’ireo namany hamonjy izany ity ramatoa tompon-trano ka roboka tokoa ary dia lasa. Tamin’ny fotoana nandehanany tany anefa dia nisy namaky ny tranony ka lasa avokoa ny vola mitentina maherin’ny 10 tapitrisa ariary, ny entam-barotra mitentina 5 tapitrisa ary ireo entana tao an-tokantrano, toy ny vilia, sotro ary akanjo.

Hatairana ny azy nahita ny varavarana midanadana rehefa namonjy fodiana vao maraina. Rehefa nojerena tao anatiny dia nasaritak’ireo mpangalatra ambony ambany ny tao an-trano. Ranomaso sy kiakiaka no nataony ka vetivety dia vory ny manodidina nijery ny zava-nisy. Tao ireo nalahelo fa tao kosa ireo naneso nanao hoe « Izao ny vokatry ny fitiavana alim-pandihizina. Variana nandihy tany, izao ny vola sy ny fananana nanjavona daholo. » Tsy fantatra kosa ireo nahavanon-doza fa ahiana ho olona mahafantatra azy ihany ka nahalala ny tsy naha tao azy tamin’io fotoana io. Nametraka fitoriana eny amin’ny mpitandro filaminana ny tenany ary misokatra ny fanadihadiana.

Laurena Nany