Nandravarava indray ireo dahalo tany amin’ny distrikan’i Betafo, ny faran’ny herinandro lasa teo. Malaso roapolo nirongo basy no fantatra fa nanao fanafihana tany amin’ny fokontany Vinanisoa, kaominina Ambohimanambola. Nipoapoaka ny feom-basy nentina nampitahorana ireo fokonolona tany amin’izany tanàna izany. Lasa noho izany ny omby maromaro tao am-bala an’ireo tantsaha sy mpamboly. Manoloana izany dia velon-taraina ireo mponina any amin’ ity kaominina ity satria mahatsiaro ho miady irery eo anatrehan’ireo mpandroba ka mangataka ny mba hojeren’ny mpitondra fanjakana akaiky. « Mba jereo izahay aty ambanivohitra ry Raiamandreny mpitondra fanjakana fa robain’ny dahalo ao anatin’ny fotoana fohy, ny omby iray na roa izay azonay tao anatin’ny folo taona tamin’ny  alalan’ny hatsembohanay. Tsy taitra mihitsy izy ireo mandroaka ny omby mivoaka ny tanàna satria tsy misy mpanara-dia. Vitsy ny zandary miasa aty aminay nefa izahay tsy sahy mifanandrina amin’ ireo dahalo raindahiny ireo », hoy ny solontenan’ireo fokonolona avy any Ambohimanambola.

Laurena Nany