Mifanindra an-dalana ny fankalazana ny fetim-pirenena sy ny iray volan’ny ankizy  ka manararaotra ny maro mampifaly ny kilonga malagasy rehetra. Toy ny ankizy rehetra dia manana zo hifety sy hankalaza ny fetim-pirenena ihany koa ireo zaza sahirana. Manoloana izany indrindra, notolorana harendrina vita malagasy ireo zaza sahirana ara-pivelomana, eny Ambohimahitsy, ny sabotsy lasa teo. Zaza 50 isa eo ho eo no nahazo tombontsoa tamin’ity asa fanasoavana ny mpiara-belona ity. Fetin’ny ankizy rahateo ity volana ity ka mahatsiaro ho manana adidy hampifaly azy ireo ny fikambanana Tafita, izay miorina eny Ambohimahitsy amin’ny alalan’ny tetikasa « Bénévolat à Madagascar et Ainga vaovaon’ny Malagasy ». « Amin’ny mahasahirana ireo ray aman-dreny dia betsaka ireo tsy mieritreritra ny hividy harendrina. Ny vidim-piainana koa miakatra hatrany. Iny harendrina nozaraina iny no hahafahan’ireo ankizy mba mifaly tahaka ny zaza malagasy rehetra mandritra ny fety ary zon’izy ireo ny mifety », hoy ny tompon’andraikitra iray ao amin’ny tetikasa « Bénévolat à Madagascar et Ainga vaovaon’ny Malagasy ».