Mihen-danja ny soatoavina Malagasy. Voaporofo amin’ny tranga miseho isan’andro eto amin’ny firenena izany, toy izay nihatra tamin’ny lehilahy iray 41 taona tany amin’ny fokontany Ambalaben’Ifasina, kaominina Marotandrano, distrikan’i Mandritsara, ny alahady 19 jona, tamin’ny 1ora tolakandro. Teo amoron-dalana miala 3km no nahitan’ny olona iray sendra nandalo ny fatiny. Niantso an-tariby avy hatrany ny zandary izy. Nidina teny an-toerana ireto farany nanao ny fizahana ka tsikaritra fa maty nisy namono ilay lehilahy. Hita mantsy fa toro ny taolam-bazany havanana, voadidin’ny antsy ny saokany, nahitana mangana ihany koa ny tratrany ary mifatotra tady ny tongony sy ny lamosiny. Mbola tsy fantatra kosa izay nahavanon-doza hatreto. Marihina fa tsy misy dokotera tany an-toerana ka natolotra ny fianakaviany avy hatrany ny razana taorian’ny fitsirihina nataon’ny mpitandro filaminana. Misokatra ny fanadihadiana.

L.N