Nampahafantarina ny talata lasa teo, teny Andrainarivo fa misokatra ho an’ny tanora rehetra ny « Fablab Mamiratra », raha natokana ho an’ireo ankizy tezaina ao amin’ny « Sos Villages d’enfants » tany am-piandohana. Ny fablab izay fampianarana nomerika miorina eny amin’ny Sos villages d’enfants ary vatsian’ny Orange fitaovana amin’ny alalan’ny fikambanana Orange solidarité. Fitaovana manaraka ny teknolojia maoderina miisa 6 no ao anatin’ny « Fablab Mamiratra » izay ahafahana mamorona asa maro. Hita ao anatin’izany ny fitaovana fandrafetana miaraka amin’ny solosaina, ny « imprimante » mamoaka sary mivaingana. Ny tsy fahafantaran’ny olona ny sehatrasa mifanaraka amin’ny teknolojia maoderina no antony nanokafana ity ivon-toerana fampianarana nomerika ity. « Mbola betsaka ireo tanora no tsy mahafantatra ny sehatrasa mifandraika amin’ny teknolojia maoderina ary antony nanokafana ity toerana ity », hoy i Randriambeloma Josie, filohan’ny Orange solidarité. Marihina fa firenena 51 isa maneran-tany no manana io Fablab io ary faharoa aty Afrika ny « Fablab Mamiratra » eny amin’ny Sos Villages d’enfants Andrainarivo.

L.N