Saika ratsy ny fiafaran’ny vehivavy iray nitondra kodiaran-droa tany Toamasina, omaly tamin’ny 11ora tany ho any, manoloana ny Boa eny Augagneur. Tsy nandeha mafy fa fahasimban’ny « accélerateur » an’ilay môtô nentiny no voalaza fa nahatonga ny loza. Vokany, nianjera avy eny ambonin’izany fitaovana izany izy ka nipitika tao ambany fiara. Sendra nandalo ilay vehivavy ka torana tsy nahatsiaro tena. Voatery nosokirina nanala azy tao fa soa fa tsy nandeha mafy ilay fiara. Ny tongony no voalaza fa tena voa mafy ary ny vavany izay nivoaka ra be mihitsy.

Vao nahita ny fitrangan’ny loza ny manodidina dia nifandrimbona nanavotra ilay niharam-boina ka nalaky voavonjy ihany izy. Nisy mpitandro filaminana ihany koa teo akaiky teo ka nentina nihazo ny hopitaly avy hatrany ilay vehivavy. Hatramin’ny tompon’ny fiara nidona taminy aza nandray ny andraikiny manoloana ity loza ity, araka ny vaovao voangona.