Tovolahy iray sahabo ho 31 taona eo ho eo indray no nataon’ny fokonolona mahamay. Tany Ivoloina, ao Toamasina no nisehoan’izany omaly antoandro, tamin’ny 12ora. Tratra ambodiomby nangalatra finday ka notazomin’ny lasibatra tamin’ny vozon’ny akanjony ary niantso vonjeo izy avy eo. Vetivety dia nitangorona ny olona ary nampihatra ny fitsaram-bahoaka avy hatrany. Tsy namelan’ny mponina mihitsy raha tsy nahazo ny sahaza azy izy. Nandeha avokoa mantsy ny daka, daroka, totohondry hatramin’ny vely hazo. Ary izay nahita dia namely avokoa ka tsy afaka nanohitra intsony ilay mpangalatra. Nijininika ny rà, vaky ny lohany, hany ka, torana tsy nahatsiaro tena izy. Tamin’izay fotoana izay vao niantsoan’ny fokonolona mpitandro filaminana naka azy teo. Naverina tamin’ny tompony kosa ilay finday avy eo. Efa eo ampelatanan’ny polisy ny raharaha.

L.N