Amin’izao ankatoky ny fankalazana ny fetim-pirenena izao dia tonga nanatitra fanomezana ho an’ny zaza kambotin’ny polisim-pirenena ao amin’ny Orphelinat Ambatolampy ny vadin’ireo tompon’andraikitra ambony ao amin’ny ministeran’ny Filaminam-bahoaka, ny alakamisy 23 jona, tamin’ny 12 ora antoandro, izay notarihin’i Barivelo Marie Diana, vadin’ny minisitra. Arendrina, akanjo mafana, kilalao isan-karazany ary indrindra indrindra ireo karazan-tsakafo, toy ny vatomamy, “biscuits” ary zava-pisotro mamy mba hahafahan’ireo ankizy mianoka ao anatin’ny fankalazana ny fetim-pirenena. Tsy  ireo vadin’ny tompon’andraikitra ambony ao amin’ny ministeran’ny Filaminam-bahoaka ihany aakory  no nahatsiaro ireo zaza fa tonga nanome izay voatsirambin’ny tanany koa ny lehiben’ny fikambanana “Chinese association for halieutic product of Madagascar”, notarihin’i Jiang Li Hui. Akanjo mafana ho an’ireo ankizy amin’izao fiatrehana ny ririnina mamirifiry izao no natolony. Fisaorana sy fankatelemana hatrany no nandraisan’ny filoha mpitantana ity fitaizana  zaza kambotin’ny polisim-pirenena ity, ny commissaire divisionnaire de police, Rafanomezantsoa Rodlish noho ny fahatsarovana sy ny fandraisana adidy atao amin’ireo zaza ireo.