Ho fitandroana ny filaminana sy ho fanatsarana ny asan’ny polisy monisipaly any amin’ny kaominina Fenoarivo-Atsinanana dia polisy miisa 7 no notolorana fanamiana vaova. Tao anatin’ny taona maro niasan’izy ireo dia voalaza fa tsy mba nanana fanamiana manokana izy ireo. Misokajy roa izany, izay natolotry ny ben’ny tanàna any an-toerana, Mananjara Franck Rico. Ny voalohany dia fitafy entina manao ny asa andavanandro, raha fitafy enti-miasa amin’ny lanonana mihaja kosa ny faharoa.  Manomboka izao dia voalaza fa hiasa andro aman’alina amin’izay ireo polisy monisipaly ireo ary hamafisina ny fiaraha-miasa amin’ny polisim-pirenena. Fepetra izay noraisina  mba hitandroana ny filaminana any an-toerana, araka ny fanazavan’i Masondahy Landry, mpanolotsaina teknikan’ny ben’ny tanànan’i Fenoarivo-Atsinanana, ny alakamisy teo, nandritra ny fizarana ireo fanamiana ireo.