Misy andian-jiolahy vaovao ahitana mpikambana miisa 8 mampihorohoro ny mponina any Analavory Miarinarivo. Mirongo fiadiana izy ireo satria mitondra basy lava roa sy sabatra ary vy fanapitsohana varavarana. Ny faran’ny herinandro lasa teo izao dia mpivarotra enta-madinika iray no nidiran’ireto olon-dratsy ireto an-keriny tao an-tranony zay toeram-pivarotana ihany. Avy hatrany dia novakian’ireo mpanafika ny varavarana ka nambanany basy avy hatrany ny olona tao an-trano ary tsy nisy sahy nihetsika. Nanaiky mora ny baiko sy nanome izay nangatahan’ireo 8 lahy vonona ny hitifitra izay manao fihetsika hafahafa ny tompon-trano. Lasan’ireo mpanafika tamin’izany ny lelavola mitentina efatra hetsy ariary, ordinatera miisa roa, taratsy familiana fiara, ary enta-madinika isan-karazany. Nitsoaka nianavaratra nihazo an’Alatsinainikely ny dian’ireo mpangalatra ary efa nampandrenesina ny mpitandro filaminana saingy tsy nisy kosa ny aina nafoy. Mihorohoro noho izany ny mponina any an-toerana satria mbola miriaria an-kalalahana ity andian-jiolahy mpanafika mirongo fiadiana ity. Tena mihantsy ny mpitandro filaminana ihany koa satria tena tao anatin’ny fotoana nanambarana fa hamafisina ny fiarovana ny vahoaka sy ny fanaraha-maso ny fiara ary ny fivezivezen’ny olona no nanaovan’izy ireo ny asa ratsiny.

Dom