Basy poleta sy hazo fikapohana ary antsy no nentin’ny jiolahy miisa telo nanafihana ny tranon’ny mpampianatra iray ao Betainomby – Toamasina ny faramparan’ny herinandro lasa teo. Norobain’izy ireo tamin’izany ny skotera iray, ordinatera miisa telo, bateria, ny lektera ary ny sakaosy misy antontan-taratsy maro. Tsy nisy tratra ireo mpangalatra satria somary nihanahana ihany ireo voatafika araka ny fampitam-baovao voaray. Ny ampitso tamin’ny 4 ora tolakandro mantsy izy ireo vao nampandre ny mpitandro filaminana sy nanao fanambara ny zavatra very. Efa tsy hita popoka intsony ny nanjavonan’ireo mpanafika ary sarotra ho an’ny polisy ny fanadihadiana satria kely ireo porofo entina hitadiavana ireo olon-dratsy.

Raha tena mitombina ity fanafihana izay niandry ela vao nampahafantarina ny mpitandro filaminana ity dia manaporofo fa tsy mbola milamina ny ao an-drenivohitr’i Toamasina ao. Maromaro ihany mantsy izay fanafihana mitam-piadiana nitranga tato ho ato izay. Tsy ny tompon-tanàna ihany no lasibatra fa afa-bela  ihany koa ireo mpandalo. Arakaraka ny tsy mampilamina ny fifandraisan’ny mpitantana sy ny mpiasa sasany ao amin’ny kaominin’i Toamasina renivohitra no toa vao mainka mampirongatra ny tsy fandriam-pahalemana araka ny filazan’ny mponina any an-toerana. Tsiahivina fa efa lasa zary mahazatra ny eo anivon’ity kaominina ity ny mifamono imasom-bahoaka noho ny fomba fijery tsy mitovy.

Dom