Roalahy nitondra kamiao no tototry ny simenitra an-taoniny afak’omaly teny amin’ny lalana Bypass. Raha ny fanazavan’ireo nanatri-maso dia vaky kodiarana teny am-pandehanana io fiarabe io ka nitsoraka tao anaty hantsana kely teo akaiky teo. Ny lohan’ilay fiara mihitsy no nitsatoka ka tsy tafavoaka tao izy roalahy raha tsy nifamonjen’ny olona noesorina ireo lasaka an-jatony. Tsy nisy ny aina nafoy tamin’ity loza ity saingy naratra ireo nitondra ny kamiao. Nanafintohina izay nahita ny vaovao niparitaka tamin’ny tambazotram-pifandraisana , ny fialangalan’ireo vatan-dehilahy maro nanatri-maso izay nibikabika toy ny manam-pahefana fotsiny fa tsy mba nanome tanana nifandrimbona nanala ireo simenitra. Amin’ny tranga toy itony dia saika ireo heverina ho mafiady sy vahoaka madinika hatrany no manao vy very ny ainy manavotra ireo tra-doza ary tsy mitady tambiny akory amin’ny asa soa ataony. Ireo mihevi-tena ho manan-katao kosa dia misomebiseby sy maka sary fotsiny no ataony ary avy eo manakihana ireo mandray andraikitra.

Misy loharanom-baovao iray hafa milaza fa vokatry ny vesatry ny entana nentiny no nampitsoraka ilay kamiao tao anaty hatsana. Heverina ho nihoatra ny lanja tokony ho zakan’ilay fiara ireo simenitra ka izay no nampivilavila ilay kamiao ary avy eo nahavaky ny kodiarana iray eo aloha. Na inona na inona zava-nitranag dia tsy azo iadian-kevitra fa vokatry ny tsy fahatomombanana teknika no nahatonga ny loza. Tsy voara-maso mialoha ny rivotry ny kodiarana, na ihany koa ilay izy mihitsy no efa sola sy ratsy ka tsy mahazaka ny vesatra entin’ny fiara intsony dia nipoaka.

Dom