Hitady hahazo vahana ny hala-jaza any an-tampon-tanànan’i Toamasina. Efa tsy menatra intsony ireo olon-dratsy misintona ireo zaza eny am-pelatananan’ireo ray aman-dreniny mba hahafahana manatanteraka ny filan-dratsiny. Toy ny tranga niseho tany amin’ny fokontany Andranomadio, ny harivan’ny 30 jona, tamin’ny 6ora sy sasany. Zaza menavava iray eny an-tsandrin-dreniny no nisy nanao sinto-mahery teo amin’ny lalana mitsofoka eo amin’ny « Melissa ». Tsy nampoizin’ilay renim-pianakaviana ny tranga niseho saingy tsy nanaiky lembenana kosa ny tenany. Raikitra noho izany ny fifampisitomana ilay tsy mana-tsiny teo amin’ny lasibatra sy ny mpangalatra. Sady niantso vonjy ihany ilay vehivavy nandritra izany ka voavonjin’ny fokonolona izy mianaka ary mbola tratra koa ilay nikasa hangala-jaza. Tsy namelanan’ny fokonolona fa nampiharana avy hatrany ny fitsaram-bahoaka. Nandritra izay ihany koa nisy ireo nampandre ny mpitandro filaminana ka tonga ara-potoana teny Andranomadio ny Emmoreg nisambotra ilay jiolahy. Efa eo am-pelatanan’ireo manam-pahefana ny raharaha.

Laurena Nany