Lehilahy lehibe 65 taona nandeha bisikileta no maty nofaohan’ny fiarabe. Io no vokatry ny lozam-pifamoivoizana mahery vaika niseho tany antampon-tanànan’i Miandrivazo, ny 1 jolay lasa teo, tamin’ny 6ora sy sasany hariva. Nandeha mafy be ilay mpamily  ka tsy nahatana ny familiana intsony ka nandona ilay lehilahy teo alohany. Mafy ny fifandonana ka nipitika tamin’ny 3 metatra niala ny toerana nisian’ny loza ilay niharam-boina ary nitontona tamin’ny tany dia maty tsy tra-drano avy eo. Nijininika ny ra eran’ny arabe ary vetivety dia vory lanona ny fokonolona. Nidina teny an-toerana ny mpitandro filaminana nisambotra ilay mpamily ary natao andrimaso. Nogiazana ihany koa ilay fiarabe. Natolotra  ny fianakaviany kosa ny razana taorian’ny fitsirihan’ny zandary sy ny fizahana nataon’ny mpitsabo.