Mirongatra ny asa ratsy ataon’ny mpanakan-dalana amin’iny lalam-pirenena Rn11a izay mampitohy an’Antsampanana sy Mahanoro iny. Ahiana hivadika ho faritra mena mihitsy aza izany raha mitohitohy ny fandrobana ataon’ireo dahalo. Eo anelanelan’ny Marofy sy Ampitak’Ihosy no tena ratsy araka ny fanazavana voaray.

Efa tsy azo andehanana amin’ny alina intsony aza izany lalam-pirenena izany, satria ireny mandeha alina ireny no jonoin’ireo mpandroba. Tsikaritra ihany koa fa ireo fiaran’olon-tsotra mandeha irery no tena mahita faisana. Apetrak’ireo dahalo eny ampovoan-dalana ny vato be na hazo be ary ireo olon-dratsy kosa miaraka amin’ny fitaovam-piadiana toy ny antsibe, famaky, hazo matevina sy ny maro hafa, hany ka vao mahita izany ny fiarakodia dia mijanona satria tsy afa-manoatra. Amin’ iny fotoana iny no hararaotin’ireo tsy mataho-tody handroba ary ireny zavatra maro entina ireny no alain’izy ireo, isan’izany ny vola, ny firavaka, ny finday ary ireo zavatra lafo vidy samihafa.

Laurena Nany