Handray anjara betsaka amin’ny fampivoarana ny fahasalamam-bahoaka ireo kaominina miisa valo ao amin’ny distrikan’i Betafo. Fantatra izany nandritra ny fiofanana miaro tomban’ezaka mikasika ny tetikasa vatsin’Ankohonana izay natao tany an-toerana tamin’ity herinandro ity. Zava-dehibe ao amin’ity tetikasan’ny filoham-pirenena ity ny fitsinjovana ny reny sy ny zaza indrindra eo amin’ny sehatry ny fampandrosoana sy ny fahasalamana ary ny fanabeazana. Andraikitr’ireo ben’ny tanàna sy ny mpiara-miasa aminy ny fanentanana ny vahoaka indrindra ny renim-pianakaviana mba hitandro sy hanaraka ny fepetra rehetra ilaina ho an’ny fahasalaman’ny isan-tokantrano. Anisan’izany ny resaka fahadioavana sy ny fanovanovana ny karazan-tsakafo ho hanina ary ny fanaovana vakisiny ny ankizy. Ny distrikan’i Betafo dia anisan’ny voalohany nahazo tombon-dahiny tamin’ny tetikasa vatsin’ankohonana izay natolotry ny filoham-pirenena ary iaraha-manatanteraka amin’ny minisitera vitsivitsy toy ny an’ny mponina sy ny fiahiana ara-tsosialy, ary ihany koa ny fanabeazam-pirenena. Tanjona amin’izany ny hitondra vahaolana ho an’ny tokantrano tena sahirana mba sady ho afaka hivelona ara-dalàna no hampiana-janaka ary hahazo voka-tsoa amin’izany. Misy famatsiam-bola manokana ho an’ireo tokantrano misitraka io tetikasa io.

Dom