Nahitana oraria mbola vatombatony iray teny amin’ny torapasik’i Libanona any Taolagnaro. Nosamborin’ny fokonolona izy io ary nozahana ara-pahasalamana maimaika ary hita fa tena mbola natanjaka tsara. Milanja any amin’ny 30 kilao any ho any ity bibin-dranomasina ity. Tsy hitan’ny olona izay nanaovana azy ary naka fanapahan-kevitra ny tompon’andraikitra fa averina any anaty rano izy. Amin’ny ankapobeny, tsy fahita firy aty amin’ny fari-dranomasin’i Madagasikara ny otaria sy ny biby mitovitovy aminy. Na izany aza anefa dia misy ihany indraindray ny maningana ka mandalo aty amintsika. Tsy vao izao fa efa nisy taona maromaro lasa izay no nahitana otaria tany amin’iny ranomasina manakaiky an’i Taolagnaro iny. Voasambotry ny mpanjono ilay biby ka nomena ny manam-pahefana. Nandray fepetra ireo manam-pahaizana sy tompon’andraikitra  momba ny biby sy ny tompon’andraikitry ny jono tamin’izany fotoana izany  fa hompiana ao anaty dobo fiompiana trondro ilay otaria mandra-pisian’ny fanapahan-kevitra hanaovana azy. Nahagaga nefa fa nisy nangalatra tao io biby io ary tsy hita izay nisy azy hatramin’izao. Toy ny mahazatra dia nosokafana ny fanadihadiana saingy tsy hita izay valiny. Inoana fa ny tranga toy izany no nahatonga ny tompon’andraikitra ao Taolagnaro namerina avy hatrany ilay otaria hita vao haingana ho any anaty ranomasina. Ny otaria moa dia karazam-biby mampinono mivelona any anaty ranomasina. Matsokotsoko vava toy ny alika izy ary misy volom-bava.

Dom