Omby iray monja no nangalarin’ny dahalo nandeha irery tany Sahaniniky ka namoizany ny ainy. Nanafika tao amin’ilay tompon’omby izy ary lasany ilay biby. Tsy natahotra fa nisarongatra avy hatrany ny fokonolona ary nanao ny fanarahan-dia vao nandre fa dahalo iray monja no nanao ny fanafihana. Tratra tokoa ilay mpangalatra ary nisy ny fifandonana. Nandritra izany no nitifiran’ny fokonolona azy ka nahatapitra ny ainy.

Noporofoin’ny mpiray tanàna tamin’ity tranga ity fa mahita vokatra tsara rehefa miray hina. Tafaverina amin’ ny tompony ilay omby very ary efa manokatra fanadihadiana mikasika izay tena zava-nitranga ny zandary any an-toerana. Mirongatra tanteraka ny halatr’omby amin’izao fotoana izao ary tsy mifidy hotafihina intsony ireo olon-dratsy fa na dia omby tokana am-pahitra aza dia alain’izy ireo ihany. Efa manomboka mametraka ny fiarovan-tena iombonana ihany koa anefa ny fokonolona ka matetika dia mahazo vokara tsara rehefa manao ny fanarahan-dia.

Dom