Vahaolana maharitra ho an’ireo lasibatry ny tifitra variraraka sy ny vono moka tamin’ny 7 febroary 2009 ny fampidirana ireo mpikambana ho mpiasam-panjakana. Tafiditra ao amin’ny tetikasan’ny filoham-pirenena izy ity ka nanomboka izao volana jolay izao ny fandraisana ny antotan-taratasin’ireo izay liana amin’izany. Tsy ho vesatra eo amin’ny fiarahamonina intsony ireo nitondra takaitra sy navelan’ireo namoy ny ainy fa afaka ny ho fanoitra eo anivon’ny firenena. Ho an’ireo maty sy nitondra takaitra ka tsy afaka miasa mantsy dia ny fianakaviany sy olona akaiky azy ireny no omena asa eo anivon’ny Fanjakana. Raha ny nambaran’ny filohan’ny AV7 dia ao anatin’ny roa volana no ezahina ho voaray avokoa ny antontan-taratasy ary ho tafiditra miasa ireo mpikambana. Tsy fantatra kosa raha mbola handray ilay fanampiana fanome azy ireo isam-bolana hatramin’ny andron’ny tetezamita ireo mpikambana na voatery tsy maintsy hiantehitra amin’izay karamany rehefa tafiditra miasa. Mandeha tsara ny tetikasa tan-tsoroka maharitra ho fanarenana ny fiainan’ireo niharam-boina tamin’iny vono olona teny Ambohitsorohitra iny saingy kosa tsy hita izay tohin’ny valin’ny fanadihadiana ho an’ireo nahavanon-doza. Ifanilihan’ny ekipan-dRavalomanana sy Rajoelina mantsy ny hadisoana ary ny fitondrana Rajaonarimampianina kosa dia tsy sahy mampihatra ny didim-pitsarana efa nivoaka.

Dom