Vehivavy vao 22 taona monja no maty voadonan’ny fiara Sprinter teny Ambohidratrimo. Taksiborosy avy any Mahajanga ity nahafaty olona ity ary voalaza fa nandeha mafy ny mpamily izay maika hidira eto Antananarivo. Vokatr’izany dia efa nalain’ny havany ny razana ary ilay saofera kosa nentina natao fanadihadiana tao amin’ny borigadin’ny zandary eny an-toerana. Amin’izao fotoana izao dia ny Sprinter no fiarakodia tena mahafaty olona betsaka indrindra. Tsy mety manaiky izany ireo tompona taksiborosy sy mpankafy ireny fiara ireny na dia hita izao aza fa vatampaty mandehandeha araka ny anaram-bositra omena azy ny Sprinter. Matetika ihany koa dia ny tsy fanajana ny lafiny ara tekinika sy ny fikojakojana ny fiara no mahatonga ny loza satria maro amin’ireo fiara mpitatitra no misedra olana ara-mekanika eny an-dalana. Ho an’ireo avy any Mahajanga manokana dia tsy manaja ny tokony hisian’ny mpamily roalahy mifandimby ny tompon’ny fiara satria kahihitra. Mpamily iray ihany no asaina miari-tory mitondra ny fiara mandra-paharainan’ny andro koa tsy mahagaga raha manodidina an’Ankazobe sy Ambohidratrimo iny no tena betsaka loza miseho. Sady reraka mantsy ny mpamily no tsy ampy torimaso ka lasa tsy mahafehy intsony ny familiana. Mandeha mafy rahateo izy ireo manararaotra ny herin’ny fiara ary tsy te hahalala izay ain’ny mpandeha ao anatiny.

Dom