Betioky Atsimo – Tafatsangana ny Dinabe hanafoanana ny asan-dahalo
Voafidy tamin’ity herinandro ity ireo mpikambana handrafitra ny biraon’ny Dinabe ao Betioky Atsimo ka nandray anjara tamin’ny fifidianana azy ireo ny fokontany 26 any an-toerana. Hiady amin’ny tsy fandriam-pahalemana, indrindra ny asan-jiolahy sy ny asan-dahalo no tena tanjona nananganana azy io ka handrafitra ireo rehetra efa misy any an-toerana. Ara-dalàna tanteraka izao fandaminana sy fepetra noraisina izao satria manaraka ny fepetra nateraky ny Dina ao amin’ny faritra Atsimo andrefana izay efa nankatoavin’ny fitsarana ambaratonga voalohany ao Toliara. Efa nohavaozina mantsy izy io ary haparitaka amin’ireo kaominina miisa 16 ao amin’ny distrikan’i Betioky Atsimo. Anisan’ny faritra mafana amin’ny asan-dahalo sy amin’ny famoahana antsokosoko ny harem-pirenena i Betioky ka izay olona efa tany dia mahatsikaritra fa vonona amin’ny fiarovan-tena mandrakariva ny mponina. Vao 13 taona monja ny tovolahy any an-toerana dia ividianana basim-borona ary maro amin’ireo olona manan-katao no manana basy poleta ho fiarovan-tena. Amin’ny ankapobeny dia milamina ao Betioky tampon-tanana fa mbola anjakan’ny halatr’omby kosa ny manodidina. Ankoatra izany, miteraka savorovoro amin’ny mponina sy ireo mpivahiny ny fanimbana tsy am-piheverana ny ala nanahary. Misy andian’olona maro mantsy tonga any Betioky ary manimba ny ala tantanin’ny vondron’olona ifotony, izay miafara amin’ny korontana hatrany ny toe-draharaha.
Dom