Mahina ny mpanao ratsy ka nandositra avy hatrany! Raha vao nifanena tamin’ny zandary nanao fisafoana ny lehilahy roa nandroaka omby, tany amin’ny fokontany Fenosoa, kaominina Miantso Ankazobe dia nandosira avy hatrany. Nampiahiahy ny zandary io fihetsika io ka nanao ny fanenjehana izy ireo. Voasambotra ireo roalahy ary niaiky fa omby halatra ireo noroahin’izy ireo. Izany hoe mpikambana amin’ny andian-dahalo ireto voasambotra ireto.

Anisan’ny distrika be asan-dahalo indrindra ato anatin’ny Faritra Analamanga Ankazobe. Araka ny fantatra dia ahiana ho ringana mihitsy ny omby any an-toerana raha tsy hisy ny paikady mahomby hisorohana izany. Amin’izao fotoana izao dia any amin’ny roa alina any sisa ny ombin’Ankazobe raha avo efatra heny noho io taona maromaro lasa izay. Tena mirongatra be ny halatr’omby any an-toerana amin’izao fotoanan’ny antanandany izao hoy ny depiote any an-toerana. Anisan’ny fositra iray mampiroborobo ny halatr’omby ny fisian’ny tambajotra matanjaka sy tsara rafitra izay miainga amin’ny fangalarana, mandalo amin’ny fanadiovana, ary miafara amin’ny fitaterana sy ny fivarotana. Ny mpanao bokin’omby sandoka no tena sarotra iadivana satria tafiditra ao anatin’ny antsoina hoe dahalo ambony latabatra.

Dom