Tsy nananan’ny dahalo hantra mihitsy fa tonga dia norarafan’izy ireo ny tifitra variraraka ny ny ramatoa tompon’ny tanàna notafihin’izy ireo tany Analaiva Morondava. Ilay renim-pianakaviana irery no tao an-trano tamin’io  fotoana noisian’ny fanafihana io ka raha vao nahare poa-basy tany ivelany izy dia nivoaka ny zava-nisy. Teo no nahavoa azy satria tsy nitsitsy ireo dahalo fa vao maika nitifitra. Tsy maty kosa anefa ramatoa fa naratra mafy ary efa nentina tany amin’ny hopitaly ka manaraka fitsaboana ao. Omby miisa 7 no lasan’ireo dahalo tamin’ity indray mitoraka ity ka mbola tsy nisy tafaverina hatramin’ny fotoana nanomezan’ny mpitandro filaminana ny vaovao. Nanao ny fanarahan-dia avy hatrany mantsy zandary taorian’io fanafihanao io ka nifanehitra tamin’ireo malaso tao amin’ny rebirano Kabatomena ao amin’ny fokontany Betsipotika. Tifi-danitra no natao nefa tsy nijanona ireo mpangalatra fa vao maika rifatra nandositra nanoy ny diany ary tafaporitsaka avokoa niaraka tamin’ny omby. Efa fantatra kosa fa lasa nihazo an’I Befasy ny dian’ireo dahalo ary mitohy ny fanenjehana atao’ny zandary izay niampy isa teny an-dalana. Raha ny tokony ho izy dia fara-faharatsiny mety ho avotra ihany ireo omby raha tsy hoe angaha efa novonoin’ireo dahalo teny an-dalana.

Dom