Mahita hevitra foana ny olon-dratsy hanaparitahana ny toaka gasy manerana ny Nosy. Entin’izy ireo amin’ny sambo indray mantsy ny galeoka mba hampihenana ny saran-dalana no sady hialana amin’ny fisavan’ny zandary eny an-dalana ihany koa. Tamin’ity herinandro ity dia tratran’ny zandary tao amin’ny seranan-tsambon’i Toamasina ny toaka gasy 2 250 litatra nafatratra tao anaty barika miisa 9. Saika hampidirina tao anaty sambo ireo toaka ireo ary tanjona tamin’izany ny hitondrana azy hamidy any Mananara Avaratra. Fetsy ilay mpanao trafika satria tsy nanaraka ny entana fa nalefa tamin’ny sambo fotsiny ka rehefa tonga any an-toerana dia misy mandray. Rehefa natao anefa ny fanadihadiana dia fantatra fa vehivavy monina any Toamasina no tompon’ireo entana ireo. Karazan’ny efa fanao ity trafika alefa sambo ity raha ny fijery azy saingy izao kosa vao tratra. Mitobaka tanteraka ny varotra toaka gasy eto Madagasikara ary hita fa tena tsy maharaka mihitsy ny mpitandro filaminana. Misy ihany ireo tratra saingy vitsy dia vitsy nefa ny galeoka mitobaka ihany. Raha ny fijery azy dia ny fanaraha-maso mihitsy no tsy ampy satria iaraha-mahalala ny toerana fanamboarana azy ireny. Ho an’ny eto an-drenivohitra manokana dia saika mivarotra izany avokoa ny ankamaroan’ireo toerana fisotroana madinidinika eny amin’ny faritra iva sy ambanimbanivohitra rehetra.

Dom