Tao Ambohimena distrikan’Antsirabe II no nahitana ny razana ny alakamisy lasa teo. Gaga ny mponina tao amin’ny vakim-paritra Ampangabato raha nahita ilay lehilahy nitsitra teo amin’ny arabe. Rehefa nojerena akaiky dia efa tsy nisy aina intsony izy. Mbola vao tamin’ny 8 ora alina anefa no nisehoan’izany ary tsy nisy nahatsikaritra akory ny nahatongavany teo. Mety ho tsikaritry ny olona ihany ny zava-niseho raha nisy namono izy. Raha ny tombatomban’ireo nanatri-maso dia toy ny mpandalo efa mamo avy any amin’izay nalehany io lehilahy io ka nidoboka teo amin’io toerana nahafatesany io. Nanamarina rahateo ny dokotera tonga nijery ny razana fa nisy fofon-toaka be ilay rangahy ary mety ho alikaola diso tafahoatra no nahafaty azy. Ny mponina sasany kosa dia miahiahy sao sanatria nisy namosavy tamin’ny toaka izy. Toe-javatra efa mateti-pitranga rahateo izany eto Madagasikara. Efa manao fanadihadiana ny mpitandro filaminana any an-toerana ka ny valin’izany no hahalalana ny tena zava-nisy marina.

Dom