Faran’izay ambany satria tsy nahatratra ny iray ampahadimin’ny mpiadina akory no afaka fanadinana Bepc tany Maroantsetra. Raha ny marimarina kokoa dia 18,88% ny taham-pahafahana tamin’ireo fanadinam-panjakana ireo rehefa nivaly ny alatsinainy lasa teo izany. Kivy tanteraka ny mpianatra sy ny ray aman-dreny ary voaporofo fa nikorosy fahana ny kalitaon’ny fampianarana any an-toerana. Tsy te ho diso ary tsy sahy nanome tsiny ny Fanjakana ny lehiben’ny fari-piadidiam-pampianarana any Maroantsetra ary nilaza fotsiny fa mila fanarenana haingana io taham-pahafahana ambany dia ambany io. Notononiny ho tompon’andraikitra amin’izany ny olona sy sehatra rehetra izay voakasiky ny tontolon’ny fanabeazana. Nambaran’ny mponina any an-toerana fa efa hatramin’ny ny ela no marisarisa ny fampianarana ao Maroantsetra satria efa an-taonany vitsivitsy no nihena hatrany ny tahan’ny ankizy afa-panadinana Bepc. Ny tena tadidin’ny maro dia ny hoe tao anatin’ny 3 taona nisesy, izany hoe nanomboka tamin’ny taona 2014 dia nihena hatrany ny tahan’ny ankizy afaka Bepc. Rehefa jerena anefa dia tena ao anatin’izao fitondram-panjakana ankehitriny izao io tsy fahombiazana io no nipoitra. Sokajian’ny ray aman-dreny sasany ho tsy fahaiza-mitantana avy amin’ny tompon’andraikim-panjakana no tena rangory fototr’izao tsy fahombiazan’ny zanak’izy ireo izao.

Dom