Tsy nisy nahalala izay niandohan’ny afo fa izy efa nijoalajoala no nanaitra ny manodidina tany amin’ny kaominina iray any Mampikony. Nihitatra vetivety tao anatin’ny fotoana fohy, noho ny haintany sy ny fitsokan’ny rivotra mafy ny afo ka tao anatin’ny minitra vitsy dia trano miisa 37 no nirehitra. Tsy afa-nanoatra nanoloana ny zava-nisy ny mponina na dia niezaka ihany aza nifehy ny firehetana. Ny nanavo-tena sisa no azo natao ka mba tsy nisy maty sy naratra tamin’ity loza goavana ity. Tombanana hatrany amin’ny 120 tapitrisa any ho any kosa ny tombambidin’ny fananana lasa laveno avy amin’ireo fianakaviana miisa 116 izay manjary tsy manan-kialofana tsy fidiny. Manao antso avo amin’ny fitondram-panjakana sy ireo malala-tanana ireto niharam-boina ireto, noho izany, satria fongana tanteraka izay nihariana an-taonany maro. Ny akanjo teny an-koditra sisa no fananana tafajanona ho azy ireo. Efa mandeha ny famotorana momba ny antony tena nahatonga ity hain-trano goavana ity saingy manahy ny mponina fa tsy hitondra inona ho azy ireo izany. Tsy ho voasolo mihisy mantsy ireo fahavoazana mitentina 120 tapitrisa Ariay ireo na dia ho fantatra aza ny niavian’ny loza. Entina hakana lesona hisorohana ny tsy hiverenan’ny hain-trano ao an-tanàna fotsiny angamba sisa izay ho valin’ny fanadihadiana eo.

Dom