Maro ny mpivaro-kena no manakatom-baravarana hatramin’ny fiandohan’ity herinandro ity. Araka ny fantatra dia tsy te hampihena ny vidin’ny henomby izy ireny ka aleony aloha tsy miasa mihitsy. Fantatra nefa fa nihena be ny vidin’ny hena hatramin’iny faran’ny herinandro iny satria efa lasa enina arivo ariary mahery kely fotsiny izany. Tia tena loatra ireo mpivaro-kena ka maro ireo tsy nampidina ny vidin’ny hena ary eo koa ireo nisafidy ny hanakaton-tsena mihitsy. Hatramin’ny omaly dia tsy mbola tazana firy ireo heverina ho mpanara-maso ny vidin’entana fa dia samy manao izay danin’ny kibony sy ny saim-pantany ireo mpivarotra . Eny Andravoahangy ambony izao dia mbola mahatratra Ar 12 000 ny kilaon’ny nofon-kena na dia efa ny antsasak’izay aza no angalan’ny mpivarotra ny hena ambongadiny. Voalazan’ireo mpivarotra fa mety mandalo ihany ny fihenan’ny vidin’ny omby ka izay no tsy ampidinan’izy ireo ny vidin’ny iray kilao. Misy ihany koa mpivarotra milaza fa mihena ny isan’ny omby mitobaka eto an-drenivohitra. Misy amin’ireo mpandraharaha hoy izy ireo no manararaotra manangona omby marobe amin’ny vidiny mora amin’izao fotoana izao ka mitetika ny hivarotra izany lafo afaka fotoana vitsy.

Dom